Бугарскиот премиер Кирил Петков синоќа истакна дека „сега ќе има многу сили кои ќе се обидат да го попречат процесот на дијалог меѓу Македонија и Бугарија.
„Да немаше такви сили, одамна ќе бевме во многу добрососедски односи со С. Македонија. Факт е дека има многу сили на Балканот кои не сакаат РС Македонија да биде дел од ЕУ, а зошто не сакаат затоа што со нестабилен Балкан во оваа геополитичка ситуација, предност ќе имаат земјите кои според мене не ни сакаат добро. Но, отсега да не се оправдуваме со странски држави, туку да ги засукаме ракавите и да ја завршиме работата. И ако го направиме тоа на ‘стариот’ начин, се сопнуваме, а ако не биде како што ние сакаме, нема да биде поинаку и ќе останеме онаму каде што сме, имено до најниската точка“, смета Петков.
Според него, „не можете да се расправате со соседот и да мислите дека тоа е добро“.
Бугарскиот премиер истакна дека нема да коментира што направил претседателот Стево Пендаровски со средбата со Македонците во Бугарија.
„Доброто е што надворешната политика на Бугарија и Северна Македонија зависи од премиерот и од Советот на министри на двете влади“, заклучува Петков.
Претходно бугарскиот претседател Румен Радев изјави дека посетата на Петков на Скопје пред две недели „била избрзана“.
„Секоја избрзана акција на бугарската влада и каков било прелиминарен позитивен сигнал може погрешно да се протолкува како некакви отстапки од бугарска страна“, потенцира Радев по повод средбата на претседателот Стево Пендаровски со претставниците на ОМО „Илинден Пирин“.
„За жал, постапките и однесувањето на претседателот на Република Северна Македонија не придонесуваат за напредок на толку посакуваниот пат на Северна Македонија кон ЕУ“, додаде Радев, пренесуваат бугарските медиуми.