Утре матичните доктори и докторите специјалисти од секундарното здравство, од Здружението на приватни лекари (ЗПЛМ) повторно ќе протестираат во своите амбуланти и нема да работат со пациенти закажани преку „Мој термин”, туку ќе примаат само итни случаи.

– Бидејќи никој од надлежните не ни се јави ние се решивме повторно на мирен протест, најави на денешната прес-конференција д-р Лилија Чолакова Дервишова, претседател на ЗПЛМ.

Ова е нивни револт кон надлежните откако не е исполнет рокот од две недели за спроведување на нивните барања даден на средбата на претставници на Здружението со заменик – министерот за здравство Владимир Рендевски, во која малку подоцна се вклучил и министерот за здравство Беким Сали.

Рокот кои тие го дадоа беше за формирање на работни групи, кои ќе работат на проблематиката, а тој истече денеска напладне.