Неодамнешната стратешка промена на Русија можеби не значи дека претседателот Владимир Путин се откажал од обидот да го заземе украинскиот главен град Киев, велат американски и западни официјални лица.
„Путин е подготвен да започне нова брутална офанзива во регионот на Донбас во источна Украина. Повторно ќе бидат вооружени, бидејќи потрошија многу муниција и ќе бидат наполнети со гориво и се што им треба, за да започнат нова голема офанзива“, изјавил генералниот секретар на НАТО, Јенс Столтенберг, пренесе Си-Ен-Ен.
Долгорочните цели на Путин се нејасни, според висок функционер во одбраната, но американските и европските функционери изјавија за Си-Ен-Ен дека сè уште е можна повторна инвазија на областа Киев, и покрај стратешката промена на Русија и тековните разговори со Украина.
„Со цел да се заштити која било територија што ја окупира на исток, очекуваме дека Русија потенцијално би можела да ја прошири својата проекција и присуство уште подлабоко во Украина, надвор од провинциите Луганск и Доњецк. Тоа е нивната намера и нивниот план“, изјави американскиот советник за национална безбедност Џејк Саливан.
САД очекуваат Русија да продолжи со воздушните и ракетните напади низ Украина, вклучувајќи ги градовите Киев, Одеса, Харков и Лавов, додаде Саливан.
„Целта на Русија, на крајот, е да ја ослаби Украина што е можно повеќе“, рече тој.