Поранешниот италијански репрезентативец Кристијан Виери изјави дека доколку Душан Влаховиќ ја завршел сезоната на „Артемио Франки“, „виолетовите“ можеле да се борат за четвртото место во конечниот пласман во Серија „А“.
Како што е познато, српскиот напаѓач во зима се пресели од Фиорентина во Јувентус. „Виолетовите“ моментално се на седмото место со 53 бодови, 9 помалку од четвртопласираниот Јувентус.
„Фиорентина заслужува честитки бидејќи игра многу добар фудбал. Мислам дека ако Влаховиќ останеше во Фиренца, „Ла Виола“ можеби ќе го зграпчеше четвртото место оваа сезона“, сподели Виери во неговата емисија „Бобо ТВ“ на платформата „Твич“.
Поранешниот напаѓач, кој смени голем број тимови во кариерата, го коментираше и претендентот за скудетото Наполи, изразувајќи мислење дека Виктор Осимен и Дрис Мертенс треба да играат заедно во нападот на „партенопејците“.