Нешто слатко после ручек. Нешто слатко за енергија. Нешто слатко за награда … Слаткото е еден од пороците од кои не можеме или не сакаме да се ослободиме. Многумина од нас се свесни и за ризиците што ги носи прекумерната потрошувачка на рафиниран шеќер – од дијабетес тип 2, срцеви заболувања, па дури и рак.
Бројни истражувања покажаа дека консумирањето шеќер доведува до таложење на таканаречените висцерални масти кои се акумулираат околу стомакот и околу црниот дроб. Исто така, не се проблем само слатките и чоколадите. Опасноста лежи и во скриените шеќери во, на пример, лебот и тестенините. Ако сакате да се ослободите од шеќерот, следете ги овие 6 чекори препорачани од нутриционистот Давид Стаче.
1. Не ја игнорирајте декларацијата
Стаче вели дека е важно да се знае приближно колку шеќер јадеме на ден: „Постојат многу скриени извори на шеќер во различни видови храна, а луѓето честопати не обрнуваат внимание на содржината на шеќер во храната – што често може да ја влоши вашата желба за слатки“. Затоа е важно да ги прочитате декларациите и да разберете што се смета за висока содржина на шеќер, а што се смета за ниска. Според NHS, храната која содржи 22,5 g на 100 g се смета за храна богата со шеќер, додека храната со до 5 грама шеќер на 100 грама е храна со малку шеќер.
2. Хидрирајте се
Следниот пат кога ќе копнеете за слатки, обидете се да пиете вода, советува Давид. „Иако водата не изгледа толку примамливо како крофната што ве очекува, понекогаш желбата е всушност резултат на дехидрација, која вашето тело ја манифестира преку желбата“. Ако и по 10 минути сте уште гладни, изедете овошје или јаткасти плодови.
3. Вежбајте
Давид вели дека вежбањето е најдобриот начин да се извлечете од храната што ја посакувате, бидејќи ослободува ендорфин што прави да се чувствувате добро, а тие можат да помогнат да се намали нездравата желба. „Брзо одење или кратко трчање, што и да сакате да направите за да започнете, ќе ви помогне да ги надминете вашите желби“, вели Давид. Ако немате време да одите, направете неколку стомачни или сквотови.
4. Најдете замена
Луѓето најчесто посегнуваат по слатки после оброк, или попладне кога ќе дојде до пад на енергијата. Наместо да ја игнорирате желбата за слатки, обидете се да ја пронајдете вашата поздрава замена која ќе биде и хранливо избалансирана. Значи, нешто со висока содржина на протеини и ниска содржина на шеќер – нешто што ќе ве засити долго време. Исто така, би било добро да внимавате на внесот на растителни влакна што е исто така корисно.
5. Поставете цели
Најтешко е да се започне, но штом ќе се спротивставите на искушението, секој пат ќе ви биде полесно. „Со текот на времето, како што ја отфрлате слатката храна за повеќе хранливи опции, вашите рецептори за вкус и преференции ќе се променат, што значи дека слатките закуски што некогаш сте ги посакувале ќе бидат помалку изразени“.
6. Исчистете ја куќата
Едноставно е – ако знаете дека немате ништо слатко во куќата, нема да бидете во искушение. Извадете ја целата нездрава храна од дома, преработените шеќери и опкружете се со поздрави опции.