Фудбалерот на Барселона, Жерар Пике се договорил со претседателот на шпанската фудбалска асоцијација, Луис Рубиалес, да го однесе Суперкупот на оваа земја во Саудиска Арабија, објави „Ел Конфиденсиал“ со сите транскрипти од разговорот.
Таму во јануари 2020 година се одигра првиот шпански Суперкуп, а пред почетокот Рубиалес изјави дека компанијата на Пике „Космос“ помагала како посредник во преговорите, наводно бесплатно.
Сепак, се покажа дека „Села“, саудиска државна компанија, на шпанскиот фудбалски сојуз му гарантирала исплата од 40.000.000 евра за секоја од шесте години играње на Суперкупот во Арабија. Компанијата „Космос“ добивала по 4.000.000 евра за секоја година, значи вкупно 24.000.000 евра за шест сезони.
„Ајде да видиме, Руби, кога станува збор за пари. Ако Реал би отишол на осум милиони… Проклетство, осум одат за Реал и исто толку за Барселона… Другите се платени два милиони и еден, значи тоа е 19, па на Федерацијата и даваш шест милиони, а на тебе ти остануваат шест, ако ја „исцедиме“ Саудиска Арабија, можеби ќе имаме повеќе. Ако не, ќе кажеме дека Реал нема да дојде“, рекол Пике во еден од разговорите со Рубиалес.
На 15 декември 2019 година, Рубиалес му честиташе на Пике за склучениот договор, што може да се слушне на аудио снимките. Шпанскиот Суперкуп за прв пат се одигра во Ријад во 2020 година.
Пике очигледно сака да се занимава со други работи надвор од теренот, па влезе во тенискиот бизнис, каде направи реформи во Дејвис купот. Покрај тоа, тој е активен и политички, каде што со години жестоко се залага за одвојување на неговата родна Каталонија од државата Шпанија. Во склоп на тоа тој често упатуваше обвинувања кон Фудбалскиот сојуз на Шпанија и државата, па оваа соработка со нејзиниот претседател е уште поизненадувачка.
Очигледно, ова не важи за приватни финансиски работи.