Лидерот на Движењето за слобода, Роберт Голоб, кој прогласи победа на парламентарните избори, изјави дека „слободата доаѓа во Словенија“.
„Утре (денес) ќе почнеме напорно да работиме за да ја оправдаме довербата, тоа е нашата посветеност кон оние кои не поддржаа“, рече Голоб синоќа преку видео повик од дома, бидејќи е заразен со коронавирусот, пренесе СТА.
„Сите вие сте одговорни за слободата што ќе дојде во Словенија“, рече Голоб.
„Танцувајте денес, утре почнува нов ден“, рече лидерот на Движењето за слобода во својот прв коментар откако излезните анкети покажаа дека неговата партија освоила 34,5 проценти од гласовите, т.е. 41 место во Националното собрание.
„Ќе работиме напорно за да ја оправдаме довербата, тоа е нашата посветеност кон оние кои не поддржаа денес“, рече Голоб.
Роберт Голоб – од менаџер до кандидат за премиер
Потенцијалниот нов премиер на Словенија, Роберт Голоб, направи успешна кариера како извршен директор во енергетскиот сектор, пред да влезе во политиката како ново име непосредно пред парламентарните избори.
Голоб, 55-годишен експерт за електроенергетски системи од западниот регион Приморска, одлучи да го предизвика актуелниот премиер Јанез Јанша на гласачките места, откако не успеа да добие поддршка на крајот на минатата година за уште еден мандат како извршен директор на ГЕН-И, по 15 години на нејзино чело, објави СТА.