При денешната посета на општина Охрид, претседателот на ВМРО-ДПМНЕ, Христијан Мицкоски даде изјава за медиуми, при што даде одговор и на ставот на премиерот на С.Македонија, Димитар Ковачевски, кој изјави дека не е спремен на дијалог, со точка на дневен ред, предвремени парламентарни избори и дека проблем е активната блокада.
„Мојот став е дека до 10 мај има рок, нека не брза, нека размисли, по 10 ние продолжуваме според она што го усвои ИК на партијата, а тоа е активна блокада на македонскиот парламент“, рече Мицкоски.
„Доколку не сака сам, тој на таа средба може да го земе и Османи, и Ахмети, и Љубчо Георгиевски, нека дојде и со Павле Трајанов, со Маја Морачанин, Горан Милевски, со сите со цела коалиција, еве јас ќе бидам со моите соработници, да разговараме за датум за избори, а до тогаш му нудам тим, да му помогне колку толку да ги ублажиме ефектите од оваа кризна состојба во која што се најде нашата земја“, кажа Мицкоски.
Тој изјави дека со месеци повикува на дијалог, на разговор, бидејќи Македонија била во криза, а луѓето од владата „се невешти да се справат со реалните проблеми, односно со кризата кои сами ја наметнале“.