Американскиот претседател Џо Бајден во четвртокот се состана со лидерите на Шведска и Финска, откако двете земји се откажаа од долгогодишната неутралност и поднесоа барање за влез во НАТО како одговор на руската инвазија на Украина.
Неколку часа пред неговото прво претседателско патување во Азија, Бајден се состана со шведската премиерка Магдалена Андерсон и со финскиот претседател Саули Ниинисто во Белата куќа за да разговараат за нивните барања за членство во НАТО.
„Ова е историски настан, пресвртница во европската безбедност. Две нации со долга традиција на неутралност ќе се приклучат на најмоќниот одбранбен сојуз во светот“, изјави Џејк Саливан, советник за национална безбедност во Белата куќа.
Tune in as I deliver remarks with Prime Minister Magdalena Andersson of Sweden and President Sauli Niinistö of Finland. https://t.co/EaRI5mkhDA
— President Biden (@POTUS) May 19, 2022
Турција изрази сомневање за влезот на Финска и Шведска во алијансата, барајќи од Шведска да престане да ги поддржува курдските милитанти кои Турција ги смета за дел од терористичка група и двете земји да ја укинат забраната за продажба на одредено оружје на Турција.
Саливан им рече на новинарите во средата дека американските власти се убедени дека можат да ја решат загриженоста на Турција, а Бајден им рече на новинарите „мислам дека се ќе биде во ред“ по ова прашање.
Сите 30 земји-членки на НАТО мора да одобрат влез на нови членки. Турскиот претседател Таип Ердоган во видеото објавено на Твитер во четвртокот рече дека Турција им кажала на сојузниците дека ќе го отфрли шведското и финското членство.