Соединетите Држави „долеваат масло на огнот“ со испораката на оружје во Киев, изјави портпаролот на Кремљ, Дмитриј Песков, како одговор на одлуката на претседателот Џо Бајден да обезбеди понапредни ракетни системи за Украина.
„Веруваме дека Соединетите Држави намерно и внимателно додаваат масло на огнот“, изјави Песков за новинарите.
Украинските власти долго време бараат САД да испорача високотехнолошки ракетни системи со среден дострел. Бајден во вторникот рече дека Соединетите Држави ѝ обезбедуваат на Украина „понапредни ракетни системи и муниција“.
Песков рече дека таквите одлуки „не придонесуваат за подготвеноста на украинското раководство да ги продолжи мировните преговори“.
Тој исто така рече дека Кремљ не им верува на зборовите на украинскиот претседател Владимир Зеленски дека Киев нема да користи ракетни системи за напад на руска територија доколку ги прими од САД.