Претседателот на Србија, Александар Вучиќ, денеска во Охрид изјавил дека „Отворен Балкан“ носи придобивки за сите земји во регионот и дека не е замена за Европската Унија, туку е посебна иницијатива на балканските народи.
Тој на новинарите пред самитот „Отворен Балкан“ им посочил дека тоа е најдобрата иницијатива во регионот во последните децении и дека нема потреба да се оправдува дали некој ќе се приклучи или не.
„Што се однесува до желбата на кој било друг да влезе во Отворен Балкан, сите се добредојдени. Вие ја нарекувате Република Косово, ние ја нарекуваме поинаку. Ако сакате да ги решаваме проблемите во интерес на граѓаните, дали ќе имаме доволно брашно, зејтин и се друго, тогаш тоа е прашање за Отворен Балкан“, му одговорил Вучиќ на новинар кој прашал дали Отворен Балкан е отворен без „Република Косово“, пренесува српски „Данас“.
На прашањето дали „Отворен Балкан“ е замена за замрзнатиот пат на Западен Балкан кон ЕУ, Вучиќ истакнал дека тој е најгласниот поборник за отворање на преговорите за ЕУ со Северна Македонија и Албанија, но дека иницијативата „Отворен Балкан“ е во корист на сите и не е замена, туку посебна иницијатива.
Вучиќ порачал дека ќе го постави прашањето како земјите од регионот можат меѓусебно да си помагаат во однос на храната, енергијата, гасот, заедничката изградба на централи, особено реверзибилни електрани.