Ќе ја напуштиме владата доколку се прифати францускиот предлог, велат од ДОМ

Раководството на владеачката партија ДОМ денеска едногласно донеле став дека предлогот на француското претседателство со ЕУ е неприфатлив и Владата треба да го отфрли.

-Отворените прашања со Бугарија треба билатерално да се решаваат во добра волја, взаемна почит и согласно европските вредности. ДОМ останува на ставот дека за македонскиот јазик и идентитет не смее да се преговара. Сметаме дека овој предлог ќе го претвори пристапниот процес за членство на Македонија во ЕУ во бескрајна агонија и го доведува во неизвесност и самото започнување на преговорите, велат од партијата.

Во соопштението се додава дека доколку Владата го прифати овој т.н. француски предлог, ДОМ ќе ја напушти Владата и парламентарното мнозинство.