Бугарскиот премиер Кирил Петков на својот Твитер профил денеска напиша дека Народното собрание донесе историско решение, што дава зелено светло на францускиот предлог за приклучување на Северна Македонија во Европската Унија.
-Денеска Собранието на Бугарија усвои историска одлука со која се дава зелено светло на францускиот предлогот за приклучување на Северна Македонија во ЕУ. Интеграцијата на Западен Балкан е од стратешки интерес за ЕУ, напиша Петков.
Воедно тој денеска од Брисел испрати порака до политичките чинители во Македонија и ги повика да не ја испуштаат шансата за почнување преговори со ЕУ.
-Бугарија успеа да направи важен чекор напред што беше многу тешко. Знаете моето раководство се расклати и јас ќе си ја дадам оставката во понеделник. А големата тема беше Македонија. Бара лидерство. Сега се обраќам кон моите партнери и моите пријатели од Република Македонија, лидерство сега исто треба да дојде и он нив, не треба да се играат внатрешно политички игри за да не се даде таа шанса. Македонија го заслужува европскиот пат и сега е шансата, оваа шанса не треба да се испушта. Ова е повик, не само кон господинот Димитар Ковачевски, со кого целото време сме имале добра комуникација. Ова е повик и кон опозицијата и кон неговите коалициони партнери. Не ја пропуштајте оваа шанса, сега е можноста Македонија да направи голем чекор напред. Не треба никој да си го мери политичкиот успех според тоа. Тоа е толку важна кауза од национална важност за Макеоднија и се надевам дека лидерство ќе биде покажано и од нивна страна, рече Петков во Брисел.