Србин осомничен за воени злосторства уапсен на излез од С. Македонија

Грчката полиција соопшти дека денеска уапсила српски државјанин кој Хрватска го бара за наводни воени злосторства во 1991 година.

Полицијата соопшти дека 59-годишникот, чие име не се соопштува, бил уапсен откако влегол во земјата од Северна Македонија, на пат кон летувалиште во Северна Грција со сопругата и ќерката.

Уапсениот во Хрватска е обвинет за учество во акции што довеле до смрт на цивили од 19 август до 14 декември 1991 година во хрватските градови Вочин и Хум.

Тој изјавил дека бил припадник на југословенската војска, но негирал дека е виновен.

Српскиот државјанин ќе биде изведен пред јавниот обвинител во Солун, а тричлениот судски совет најверојатно следната недела ќе го разгледа барањето за екстрадиција во Хрватска.