Жестоките препукувања помеѓу пратениците во Собранието траеа до полноќ.
Расправата во салата била тензична дотаму што, пратеникот Бајрам Кадрија од ДУИ го држи и штити микрофонот на кој зборува пратеничката од редовите на СДСМ, Снежана Калеска-Ванчева, додека пратениците од ВМРО-ДПМНЕ се обидуваат да го исклучат за да не се прогласи крај на седницата, бидејќи според нив, таа не била ниту започната.
-Никогаш нема да се согласам и оправдам били каков вид на насилство и од било кого. Нема оправдување за однесувањето на пратеничките и пратениците кои синоќа на ЗПК, чија претседателка сум јас, вршеа флагрантна злоупотреба на пратеничката функција и непочитување на деливникот, вели во изјава за „Локално“, пратеничката Калеска-Ванчева.
Таа појаснува дека секогаш ќе биде на линија на демократијата, правото на слободно изразување и искажување на сопствените ставови за било кое прашање, но и за целисно почитување на Уставот, Законите кога станува збор за Собранието, почитување на деловникот за работа.
– Со вербални наоади, омаловажувања, дискредитации и вербално насилство пратениците од опозицијата, синоќа и завчера сакаа да спречат одржување на седницата и вистинска материјална расправа, вели пратеничката од СДСМ.
Калеска-Ванчева смета дека инцидентот со Арбер Адеми се случил како последица на тешките, континурани провокации и навреди и оневозможувања за нормално работење на комисијата.
-Јас жалам што колегата Адеми во еден момент не успеа да се воздржи и во афектна ситуација го стори тоа што го виде целата јавност. Веќе реков и повторно ќе кажам дека осудувам било каков чин на непристојно или насилно однесување, од било кого, но длабоко сум убедена дека ова се случи како последица на тешките, континурани провокации и навреди и оневозможувања за нормално работење на Комисијата. Зошто ова го прави опозицијата е дел од сценариото за нивната активна блокада и провоцирање за предвремени избори, но во конкретниов случај, повеќе е да се спречи редовното функционирање на судовите и оневозможување да продолжат со редовен, согласно закон континуитет на одржувања на судските рочишта од интерес на ВМРО, подвелкува Калеска-Ванчева.
Б.М.