Наќе Чулев нема добиено отказ од Агенцијата за разузнавање, тој од 8 јуни 2022 е суспендиран од работа, се вели во одговорот на Агенцијата, пишува МИА.
-Причина за суспензија е добиеното Решение од Дирекцијата за безбедност на класифицирани информации со кое се регулира материја поврзана со безбедносниот сертификат. До овој момент Наќе Чулев нема добиено отказ од Агенцијата. Со ова Агенцијата за разузнавање констатира дека Наќе Чулев манипулира со јавноста, се наведува во одговорот на Агенцијата.
Претходно поранешниот технички, Чулев на Фејсбук објави дека по 25 години во служба за татковината повеќе не е дел од безбедносниот систем.
По повеќе од 25 години поминати во служба на татковината и граѓаните на Македонија, не по моја вина, на мое жалење повеќе не сум дел од безбедносниот систем. Криминалниот режим кој ја предводи власта и за жал ја води државата со сета сила удри и по мене и по мојот професионален интегритет. Јас сум човек – професионалец кој својата кариера ја градел чекор по чекор, почнувајќи од најниското скалило во службата, напиша Чулев.
Тој наведува дека сите овие години бил „во првите редови на одбраната на уставниот поредок, територијалниот суверенитет и интегритет и безбедноста и интересите на Македонија“.