Универзитетот за наука и технологија во Хонг Конг (HKUST) објави дека ќе зачекори во нова ера на дигитално образование од далечина со својот следен проект. Имено, тие мислеа дека покрај нивните вистински кампуси во Хонг Конг и Гуангжу, Кина, оваа есен да отворат и трет, но виртуелен кампус во метаверзумот, наречен MetaHKUST. Тоа треба да биде платформа, напојувана со технологии за проширена и виртуелна реалност, која ќе ги поврзува сите нивни физички локации, студенти и професори, без разлика каде се наоѓаат.
MetaHKUST оваа година ги отвора вратите само со првиот чекор од долгорочниот план. Во првата фаза ќе се постават камери, опрема, сензори и други уреди за визуелизација во училниците. После тоа, тие ќе ги поканат сите членови на нивната заедница да им се придружат во голем проект за 3D скенирање на сите соби, за да можат да бидат мапирани во виртуелна реалност. По создавањето на ваква виртуелна средина, професорите и студентите ќе можат да ги креираат своите аватари, NFT, токени, виртуелни објекти и сè што мора да има метаверзумот.
Раководството на универзитетот очекува дека овој потег ќе поттикне дополнителна размена на информации, развој на нови форми на учење и дека ќе се поедностават различните административни процедури. Дипломите, на пример, ќе се издаваат во форма на NFT на блокчејн, а настаните како што се промоции ќе можат да се одвиваат паралелно – и во реалниот и во виртуелниот свет.
Универзитетот соопшти и дека се добредојдени сите предлози за подобрување на проектот MetaHKUST. Во моментов, тимовите работат на создавање на првата виртуелна училница, со површина од околу 220 м2, која планираат да ја отворат во септември. Во неа, учесниците на факултетот од двата кампуси на HKUST ќе можат да ги слушаат првите предавања во исто време, и на исто виртуелно место.