Македонија дефинитивно оди во вистинска насока одбирајќи го патот кон ЕУ, наведе вицепремиерот за економски прашања, Фатмир Битиќи, во интервју за „Фронтлајн“.
Битиќи потсети дека Владата обезбеди струја и покрај енергетска криза и наспроти сите сомнежи дека ќе нема да можат да испорачаат.
„Осигуравме електрична енергија, осигуравме топлинска енергија за цел град Скопје, не дозволувајќи граѓаните да останат со студени радијатори. И она што е многу важно, им го олеснивме на сите граѓани товарот на скапата струја да не паден врз нив, туку ги субвенционираме. Секој граѓанин во државата, еден милион осумстотини триесет и шест илјади попишани наши сограѓани добиваат по 6.800 денари за 2022 година или по 21.000 по семејство субвенционирана струја. Некој ќе рече зошто не е по 1.000 евра, затоа што таква е нашата структура толку е нашиот фискален капацитет“, потсетува Битиќи.
Но не беа заборавени и компаниите, вели тој. За само три години биле подржани 600 компании, домашни и странски.
„Ние ги поддржуваме компаниите за да генерираат нови работни места и подобро платени работни места. Ние не правиме компромис меѓу бизнисот и работниците. Ние сме социјалдемократска Влада, за нас животниот стандард на работниците е на прво место“, истакна Битиќи.