Земјите од ЕУ не успеаја да се договорат за нови санкции против Русија во петокот трет ден по ред, при што Полска го отфрли барањето на Италија за полесни нови ограничувања за увозот на гума, велат дипломатите.
Полска рече дека предложените ограничувања за увоз на руска гума во ЕУ вклучуваат толку голема квота за ослободување и толку долги транзициски периоди што тие нема да имаат ефект во пракса.
Другите земји од ЕУ беа збунети од фактот дека Варшава, со својата позиција, ризикува да не усвои нови санкции на годишнината од рускиот напад врз Украина, и тоа поради само еден елемент од поширокиот пакет.
„Ова е многу лоша оптика. Она што требаше да биде клучно овде беше пораката за солидарност со Украина на овој посебен ден“, рече еден дипломат вклучен во преговорите меѓу 27-те земји на ЕУ во седиштето на блокот во Брисел.
Сите земји-членки мора да ги одобрат санкциите за тие да стапат на сила, поради што преговорите на 27-те често се долги и мачни.
ЕУ најави дека ова ќе биде десетта рунда санкции против Русија од почетокот на војната.
Меѓу другото, тие ќе санкционираат поединци кои Западот ги смета за руски пропагандисти, како и оние кои Киев ги смета за одговорни за депортацијата на украинските деца во Русија.
Новите санкции ќе исклучат уште неколку руски банки од глобалниот систем SWIFT.
„Можевме да се договориме во вторникот. Ова е бизарно“, заклучил друг европски дипломат.