На почетокот на овој месец, Владимир Путин беше обвинет од Меѓународниот кривичен суд (МКС) за илегално депортирање деца од Украина во Русија, а пред да добие шанса да се соочи со правдата пред судот во Хаг, тој може да биде „замолчен“ од елита од неговата земја, вели рускиот аналитичар Влад Михенко.
Експертот за посткомунистичка трансформација на Источна Европа и поранешниот Советски Сојуз од британскиот универзитет Оксфорд објасни за Newsweek дека Владимир Путин би можел да биде замолчен од „силовиците“, елитна група руски бизнисмени и истакнати политичари.
„Со оглед на широките врски на Путин низ Европа и она што тој потенцијално би можел да им го каже на судиите за корупцијата и непријатните зделки меѓу Москва и главните западни престолнини, ќе има многу поттик да се замолчи пред Хаг“, истакнува Михенко.
Тој додава дека налогот за апсење на МКС го направи Путин многу поранлив дома. Иако Москва не ја признава јурисдикцијата на МКС и не ги екстрадира своите државјани, Михенко истакна дека Путин би можел да биде уапсен и испратен на суд во Хаг ако биде отстранет од власт или ако руските елити го организираат неговото апсење за да го соборат од власт.
Иако Кремљ се обидува да го занемари налогот за апсење, Михенко верува дека ако Путин ризикува да ги посети земјите-членки на МКС и „западне во неволја“, тоа може да биде резултат на тоа што „силовиците“ го наместиле неговото апсење „за да се ослободат од него“ или со цел да се обноват односите на Русија со Западот.