Денеска во Охридскиот суд се одржа ново рочиште од предметот за претепувањето на охриѓанецот со бугарска самосвест, Христијан Пендиков, на кое беа презентирани доказите на обвинителството, меѓу кои и снимката од безбедносните камери од пред кафе-барот на кејот на Охридското Езеро, кога се случил немилиот настан.
Снимката од камерата презентирана во судот покажала како ноќта на 19-ти јануари, меѓу паркирани автомобили, две млади момчиња претепале трет, кој бил во одбранбена позиција. Се гледаат удари во пределот на главата и грбот и се гледа како претепаниот паѓа на земја, по што еден од двајцата го удира со клоци во горниот дел од телото.
На снимката се гледа и трето лице кое приоѓа и набљудува што се случува, но не учествува во тепањето.
Според адвокатот на првообвинетиот Илија Спасески, обвинителството нема докази дека едно од лицата кои го извршиле тепањето е обвинет и тоа мора да се докаже.
Според изнесеното во судот, Спасески влегол во кафе-барот во кој бил Пендиков со својата девојка и го удрил по глава со зборовите: „Не ти е срам да се пишеш Бугарин?“.
На следното рочиште ќе бидат сослушани вештаци и сведоци. По барање на одбраната на Спасески, меѓу нив ќе биде и неговиот татко, кој учествувал во спасувањето на бугарски државјани во несреќата со потонатиот туристички брод „Илинден“ во 2009 година.
Спасески е обвинет за нанесување тешка телесна повреда од омраза, а одбраната има за цел да докаже дека делото не го сторил и не бил поттикнат од етничка омраза.
Фото: БТА