Пендаровски не престанува да се нуди на владеачката коалиција, мислејќи дека повторно ќе биде претседателски кандидат. Јас морам да го разочарам и да му кажам дека тој е најпосакуваниот противник за опозицијата на следните претседателски избори, бидејќи ќе изгуби. Сите овие гимнастики на отворена сцена не му доликуваат, изјави денеска лидерот на ВМРО-ДПМНЕ, Христијан Мицкоски од општина Аеродром, одговарајќи на новинарски прашања.
Според него, „шефот на државата Пендаровски е лош пример за претседател“.
-Човек се чуди на глупостите. Претседателот како аналитичар се служи со народни мудрости и јас го повикувам да не се крие позади Собранието и тие законски решенија да не ги потпише. Го има тоа како можност, рече меѓу другото Мицкоски.
Пендаровски вчера во дебатна емисија рече дека е против законските измени со кои се предвидува зголемување на работната недела од 40 на 60 часа за потребите на конзорциумот „Бехтел и Енка“ кој треба да ги гради Коридорите 8 и 10Д.
На прашање дали се сомнева во нашите локални авторитети, тој одговори дека во секое жито има какол.