Во заедничка акција на белгиската и шпанската полиција, со помош на Европол, беше разоткриена подземна банка, која, како што се сомневаат, ја користеле разни криминалци за перење пари заработени од криминални активности, главно од трговија со кокаин. Се сомнева дека низ таа подземна банка поминале најмалку 180 милиони евра, односно дека се испрани, а ја користела криминална група составена од Мароканци, Шпанци и Белгијци. Тие биле активни во Белгија и, според Европол, имале криминални ограноци во Холандија, Шпанија, Јужна Америка и Дубаи.
Европол наведува дека осомничените развиле специјално дизајниран систем за перење пари за шверц на кокаин. Низ пристаништата и аеродромите на ЕУ се шверцувала дрога, а во оваа акција биле уапсени шест лица, пет во Белгија и едно во Шпанија. При тоа, одземени се три недвижности, 1,2 милиони криптовалути, 50.000 евра, луксузни возила, накит, 23 телефони, три банкарски сефови, машина за броење банкноти…
Криминалната организација инвестирала во криптовалути, по што готовината ја дистрибуирала преку подземен банкарски систем. Осомничените парите ги инвестирале во луксузни недвижнини низ ЕУ и во неколку марокански градови. Истрагата беше започната во октомври 2021 година благодарение на дешифрирањето на пораките на SKY ECC. Станува збор за криптирана апликација која беше хакирана од ФБИ и ја користеа криминалците ширум светот.
Собраните податоци беа проследени до полицијата ширум светот, која благодарение на нив почна да разбива тешки криминални организации. Една од нив е гореспоменатата, која се занимавала со шверц на кокаин од Јужна Америка во Европа. Дрогата била криумчарена скриена во товарен брод или во авион, а се работи за вкупно неколку тони кокаин. Откако дрогата дополнително била препродадена, криминалната организација заработила огромни суми пари кои некако морале да се легализираат. А криминалците знаат како да го направат тоа, па основале сопствена подземна банка за ваквите „инвестиции“ да изгледаат што е можно полегално.
Користеле и тајни фирми, а обемот на таа работа останал скриен од властите додека не се дешифрирала комуникацијата на SKY.