Вицепремиерот за економски прашања Фатмир Битиќи и министерот за внатрешни работи Оливер Спасовски изразија сочувство по повод смртта на Дарко Димовски, претседател на Сојузот на синдикатите на Македонија (ССМ).
Во објава на својот фејсбук-профил, Битиќи посочува дека Димовски бил вистински партнер со кого „сработевме многу за заштита и унапредување на работничките права“.
„Дарко почивај во мир! Сочувство до семејството, соработниците и пријателите“, напиша Битиќи.
Во објава на својот фејсбук-профил, Спасовски наведе дека Димовски бил пример за сеопфатно застапување на интересите на сите работници.
„Во свое и во име на МВР изразувам сочувство до семејството и најблиските на прерано починатиот Дарко Димовски, претседател на ССМ. Димовски беше пример за спроведување на социјална правда, за сеопфатно застапување на економските и социјалните интереси на сите работници. Нека почива во мир“, напиша Спасовски.
Од Синдикатот денеска информираа дека Дарко Димовски почина по кратко боледување на 45-годишна возраст.