Иницијативата „Отворен Балкан“ е создадена како оригинална иницијатива на највисоките државни функционери во Србија, Албанија и Северна Македонија и испраќа силна порака – немаме право да чекаме, треба самостојно да носиме одлуки затоа што од нас самите зависи судбината на нашите економии, изјави министерот за трговија на Србија, Томислав Момировиќ по вчерашната средба со министерката за надворешна трговија и економски односи на Босна и Херцеговина, Сташа Кошарц, како и со членовите на делегацијата на двете министерства и претставници на коморскиот систем во Босна и Херцеговина.
– Со формирањето на „Отворен Балкан“ успеавме да укинеме голем број фитосанитарни процеси, да ги намалиме трошоците за нашите земјоделски компании, а од јули очекуваме дополнителна либерализација на пазарот на труд кога работниците од која било од овие три земји ќе можат да работиме во овие земји без дополнителни административни бариери – рече Момировиќ.
Министерот Момировиќ додаде дека главната цел на Србија, Албанија и Северна Македонија е економски раст, инклузивност, нова перспектива за нашите компании, како и дека „Отворениот Балкан“ нема целосна перспектива без БиХ, но дека тоа не е одлука на Владата на Србија, ниту на народот во Србија.
– Дали БиХ ќе биде дел од „Отворен Балкан“ е исклучиво прашање на жителите на БиХ. Ги почитуваме нашите пријатели во БиХ и каква и да е нивната одлука, тие ја имаат нашата поддршка – изјави Момировиќ.
Во продолжение на разговорот стана збор за билатералните односи меѓу Србија и Босна и Херцеговина, при што министерот Момировиќ подвлече дека трговската размена меѓу Србија и Босна и Херцеговина во 2022 година изнесува околу 3,2 милијарди евра, што ја рангира Босна и Херцеговина на третото место како најважен економски партнер на Србија, веднаш зад Германија и Кина.
– Нашата економска поврзаност и трговската размена укажуваат на тоа дека се работи за економски сојуз кој не е целосно искористен. Затоа во наредниот период максимално ќе се посветам на работа на укинување на непотребните административни бариери, создавање интегрирани гранични премини, бидејќи секое административно ограничување ја намалува економската шанса и перспектива на нашите земји. Ако сакаме вистински економски развој, треба да се угледаме на ЕУ, која одамна ги укина сите бариери, а тоа мораме да го правиме овде на Балканот додека не станеме членка на ЕУ – заклучи Момировиќ.