Американските разузнавачки служби однапред знаеле дека шефот на „Вагнер“ Евгениј Пригожин планира да започне воена акција против руското воено раководство, јавуваат американските медиуми.
Според „Њујорк тајмс“, американските разузнавачи во средата ги информирале Пентагон и Белата куќа за најавите дека Пригожин „планира нешто“, но тие работеле на прецизирање на конечната проценка. Откако добија дополнителна потврда, разузнавачките претставници во четвртокот информирале мала група конгресмени за можниот заговор. Весникот наведува дека американските власти молчеле бидејќи верувале дека доколку кажат нешто, рускиот претседател Владимир Путин може да ги обвини за организирање државен удар.
„Тие очигледно не беа заинтересирани да му помогнат на Путин да избегне голем, срамен пад на неговата поддршка“, напиша NYT.
Во овој случај, се додава, како „алармантна“ се карактеризираат информациите дека долгогодишниот конфликт меѓу Пригожин и руските одбранбени претставници ќе прерасне во конфликт.
„Господин Пригожин е познат по својата бруталност и, доколку успееше да собори функционери, веројатно ќе беше непредвидлив лидер. Можноста големиот нуклеарен ривал на САД да доживее внатрешен хаос со себе носи ново ниво на ризик“, пишува весникот.
Според „Вашингтон пост“, американските разузнавачки служби во средината на јуни добиле информации кои укажуваат дека Пригожин планира вооружена акција против рускиот воен естаблишмент. Се додава дека разузнавачите за тоа итно ја известиле Белата куќа и другите владини агенции за да не бидат затекнати од таквиот развој на ситуацијата во Русија.
Неименуваните извори на весникот велат дека природата и времето на плановите на Пригожин не биле јасни додека не започнал конфликтот во петокот.
„Сепак, имаше доволно сигнали за да и се каже на администрацијата во Вашингтон дека нешто се случува“, рекол американскиот функционер, кој сакал да остане анонимен, додавајќи дека смета дека САД се подготвени за тоа.
Тој рекол дека во текот на изминатите две недели постоела „голема загриженост“ за тоа што може да се случи – дали Путин ќе остане на власт и што би можело да значи каква било нестабилност за контрола на рускиот нуклеарен арсенал.
„Нестабилноста што може да доведе до граѓанска војна во Русија беше главниот страв“, велат соговорниците на „Вашингтон пост“ и додале дека покрај Белата куќа, за информациите од Русија биле брифирани и високи функционери во Пентагон, Стејт департментот и во Конгресот.