Хамас ја презеде одговорноста за нападот со возило врз група луѓе во Тел Авив и рече дека тоа е одмазда за големата израелска операција на Западниот Брег.
Повредени се осум лица, а најмалку пет лица се во тешка состојба, соопштија од двете болници кои ги примија повредените. 20-годишен палестински напаѓач од окупираниот Западен Брег влетал со возило во група луѓе, а потоа го продолжил нападот вооружен со нож.
Напаѓачот бил убиен од вооружен цивил, соопшти полицијата. Израелската безбедносна агенција „Шин Бет“ објави дека напаѓачот влегол во Израел без дозвола и не им бил познат на израелските власти.
Хамас тврди дека напаѓачот бил еден од неговите членови и дека нападот бил „чин на самоодбрана среде тековниот ционистички масакр во Џенин“.
Израел е блиску до завршување на операцијата во Џенин, изјави во вторникот советникот за национална безбедност на премиерот Бенјамин Нетанјаху, по најжестоките борби на жариштето на Западниот Брег во повеќе од две децении, при што загинаа 10 Палестинци, а илјадници беа принудени да избегаат.
Десничарскиот министер за полиција на Израел, Итамар Бен-Гвир дојде на местото на нападот во Тел Авив и го повтори својот повик до граѓаните да носат оружје за да се одбранат во улични напади.
„Кога Израел ја започна својата активност во Џенин, знаевме дека тероризмот ќе се обиде да се закани“, рече тој.