Патник на летот на „Алјаска ерлајнс“ од Атланта во американската држава Џорџија до Сиетл е обвинет за закана со бомба поради која пилотите го приземјиле авионот во Спокејн, Вашингтон, објави „Сиетл тајмс“.
Според весникот, документите поднесени во Окружниот суд на САД наведуваат дека Брендон Скот (38) се соочува со обвиненија за лажни информации и измама.
Скот им рекол на инспекторите дека ја дал лажната закана надевајќи се дека ќе биде уапсен бидејќи членови на моќен картел го чекале во Сиетл за да го убијат.
Откако авионот полетал во средата попладне, Скот ѝ дал белешка на стјуардесата во која пишувало дека има „неколку килограми“ рачно изработен експлозив во рачниот багаж и детонатор, според судските документи.
Во пораката Скот барал авионот да биде пренасочен на „кој било друг аеродром“ и се заканил дека ќе ги убие сите во авионот доколку слета во Сиетл, пренесе АП.
Во пораката ѝ се наложува на стјуардесата да го предупреди пилотот и контролорите на летање, но да не го открива тоа на другите во авионот, се наведува во документите. Во пораката тој наведува дека „мирно“ ќе се предаде по пристигнувањето на пренасочената дестинација, се вели во судската пријава.
По пристигнувањето во Спокејн, Скот бил приведен, но при претресот не бил пронајден експлозив, според судските документи.
Скот е во затвор и се соочува со затворска казна до пет години и можна парична казна од 250.000 долари доколку биде осуден.