Ако имате над 40 години, пушите цигари, пиете или употребувате опиоиди, голема е веројатноста дека нема да ја доживеете осмата или деветтата деценија.
Ова можеби не е новост, но долгорочното истражување на речиси 720.000 американски воени ветерани покажа дека лошите животни навики се најлоши, барем меѓу поранешните војници, кои имаат поголема веројатност да страдаат од состојби како посттрауматско стресно растројство отколку општата популација.
За потребите на студијата, тим научници предводени од Ксуан-Маи Нгуен од Универзитетот во Илиноис проучувале осум животни навики за кои се смета дека придонесуваат за здрав начин на живот, а тоа се физичка активност, правилна исхрана, избегнување големи количини на алкохол, избегнување цигари, добра толеранција на стрес и добар сон, одржување на позитивни социјални односи и некористење опиоидни лекови против болки.
Осаменоста, нездравата храна, лошиот сон и прекумерниот стрес во некои случаи се покажаа лоши речиси еднакво како пушењето или опиоидите за секој што сака да го живее животот со својот максимален потенцијал.
Студијата покажа дека физичката неактивност е исто толку лоша како и зависноста од никотин или опиоиди.
Студијата, претставена на меѓународната конференција Nutrition 2023 во Бостон, покажа дека мажите во 40-тите години со сите осум лоши навики ќе си го скратат животот за 24 години, а за жените тоа би било 21 година.
Пушачите, зависниците од опиоиди и оние кои едвај вежбале имале 30 до 45 отсто поголем ризик од смрт, а оние кои сакале да се опиваат, лошо јаделе, не спиеле доволно или биле под голем стрес имале 20 отсто поголем ризик од смрт.
Самците постари од 40 години можат да се релаксираат бидејќи „недостатокот на позитивни социјални односи“ е поврзан со само пет проценти поголем ризик од смрт.
Наодите „ја нагласуваат улогата што начинот на живот ја игра во развојот на хронични болести како што се дијабетес тип 2 и срцеви заболувања кои водат до преран инвалидитет и смрт“.