Украинското Министерство за надворешни работи и највисоките функционери во Киев ги осудија коментарите на висок функционер на НАТО кој шпекулира дека отстапувањето територија на Русија во замена за членство во НАТО може да биде начин да се стави крај на војната меѓу двете земји.
„Отсекогаш претпоставувавме дека Алијансата, како и Украина, не тргува со територии“, напиша на Фејсбук портпаролот на Министерството за надворешни работи Олех Николенко, додавајќи дека таквите предлози „се во полза на Русија“.
Олексеј Данилов, секретар на Советот за национална безбедност и одбрана, во гостување на украинската телевизија, коментарите на Стиан Јенсен, началникот на Генералштабот на генералниот секретар на НАТО, Јенс Столтенберг, ги нарече „чуден потег“.
„Апсолутно е нејасно зошто е така кажано“, рекол Данилов.
За време на панел дискусијата на 15 август во Арендал, Норвешка, Јенсен рекол дека тоа би можело да биде „можно решение“ за ставање крај на конфликтот. Тој, исто така, го повторил ставот на НАТО дека сите одлуки за преговорите со Русија се на Киев.
Во коментар за РСЕ на 16 август, прес-службата на НАТО изјавата за територијални отстапки ја нарекла „грешка“.
Јенсен исто така за норвешкио весник изјавил дека не требало да зборува толку поедноставено како што зборувал.
„Мојата изјава за тоа беше дел од пошироката дискусија за можните идни сценарија во Украина и не требаше да го кажам тоа така. Тоа беше грешка“, изјавил тој за норвешкиот весник VG.
Но, Јенсен не се откажал од идејата дека договорот за членство на земјата во НАТО на крајот би можел да биде на маса.
Ако имало сериозни мировни разговори, тогаш воената ситуација во тоа време, вклучително и кој контролира која територија, „нужно ќе има одлучувачко влијание“, вели тој.
„Поради оваа причина, клучно е да ги поддржиме Украинците со она што им треба“, продолжи тој, истакнувајќи дека членките на НАТО стојат зад Украина.
Украинскиот претседател Володимир Зеленски изјави за време на самитот на НАТО во Вилнус во јули дека Киев останува посветен на ослободување на целата територија на Украина и никогаш нема да се согласи да отстапи територија како дел од мировниот договор со Москва.
Министерот за надворешни работи Дмитро Кулеба на почетокот на оваа година изјави дека „Украина не прифаќа никакви предлози што би вклучиле губење на нејзините територии или замрзнување на конфликтот“.
Портпаролката на руското Министерство за надворешни работи Марија Захарова ги нарече коментарите на Јенсен „лажна приказна која има одредени политички цели“, повторувајќи го противењето на Москва за можното членство на Украина во НАТО.