Русија ќе започне со нуклеарни тестирања само доколку тоа го направат први САД, изјави членот на постојаното претставништво на Русија Дмитриј Глухов на седницата на Генералното собрание на Обединетите нации, посветена на Меѓународниот ден против нуклеарното тестирање.
„Изјавата на претседателот на Русија Владимир Путин за време на неговото обраќање пред Федералното собрание на Русија за хипотетичката можност нашата земја да ги обнови нуклеарните тестирања, што беше споменато денеска од некои делегации, треба да се разгледува исклучиво во контекст на нашиот одговор на деструктивни акции на САД. Тоа е превентивен сигнал за Вашингтон. Ќе прибегнеме кон таков чекор само ако тоа прво го направат Соединетите Американски Држави“, рече тој.
За разлика од САД, Русија не само што го потпиша, туку и го ратификуваше Договорот за сеопфатна забрана на нуклеарни тестови, па затоа Москва не го признава правото на Вашингтон да упатува какви било обвинувања против него, рече рускиот дипломат.
Меѓународниот ден против нуклеарните тестови се одбележува на 29 август, а е воспоставен со резолуција на Генералното собрание на Обединетите нации на 2 декември 2009 година. Иницијатор беше Казахстан. На 29 август 1991 година, претседателот на Казахстан, Нурсултан Назарбаев, потпиша указ „За затворање на полигонот Семипалатинск за тестирање на нуклеарно оружје“, пренесува „Спутник“.