Африканската унија, континентална организација од 55 земји-членки, би го добила истиот статус како и Европската унија – единствениот регионален блок со полноправно членство. Нејзиното сегашно име е „поканета меѓународна организација“.
„Ја поздравуваме Африканската унија како постојана членка на Г20 и цврсто веруваме дека вклучувањето на Африканската унија во Г20 значително ќе придонесе за решавање на глобалните предизвици на нашето време“, се вели во нацрт-декларацијата.
Други прашања за кои ќе се одлучи на самитот вклучуваат повеќе заеми на земјите во развој од мултилатерални институции, реформа на меѓународниот долг, регулативи за криптовалути и влијанието на геополитиката врз безбедноста на храната и енергијата.
Во нацртот од 38 страници претставен пред членовите, ставот за „геополитичката ситуација“ беше оставен празен, а беа договорени уште околу 75 ставови, вклучувајќи климатски промени, криптовалути и реформи во мултилатералните развојни банки.
Влезот на Африканската унија беше предложен од индискиот премиер Нарендра Моди во јуни, а ниту една членка не се спротивстави на потегот, објави во четвртокот Ројтерс.
Г-20 во моментов се состои од 19 земји и Европската унија, а членките претставуваат околу 85 отсто од светскиот БДП, повеќе од 75 отсто од глобалната трговија и околу две третини од светското население.