СветСлајдер

КАТАСТРОФА ВО ЛИБИЈА Илјадници мртви, 6000 исчезнати: „Целиот град е уништен! Браните попуштија, водата носеше се’

од Vladimir Zorba
540 прегледи

Се стравува дека илјадници луѓе се мртви во Либија откако бурата „Даниел“ донесе толку многу дожд на североисток што две брани се урнаа во еден регион, повлекувајќи цели населби во морето, јавува Си-Ен-Ен.

Повеќе од 2.000 луѓе загинаа, а уште околу 6.000 се водат за исчезнати во тешко погодениот град Дерна, рече Отман Абдулџалил, министер за здравство на една од двете ривалски влади кои се борат за власт во северноафриканската држава.

„Ситуацијата во Дерна е катастрофална… Тела сè уште лежат на многу места“, изјави Абдулџалил за либиската телевизија Алмасар, известувајќи од Дерн во понеделникот. Опишувајќи ја Дерна како „град на духови“, Абдулџалил рече дека делови од градот се изолирани поради поплавите. Тој апелираше до меѓународната заедница за помош, велејќи дека на властите итно им се потребни тимови за пребарување и спасување.

Ахмед Мисмари, портпарол на Либиската национална армија (ЛНА) со седиште во источниот дел на земјата, рече дека две брани се урнале под притисокот на поплавите. „Како резултат на тоа се урнаа три моста. Водата однесе цели населби и на крајот ги наталожи во морето“, рече тој.

Шефот на либиската служба за вонредни состојби, Осама Али, за Си-Ен-Ен изјави дека по уривањето на браната „целата вода отишла во областа кај Дерна, која е планинска крајбрежна област“. „Куќите во долините беа однесени од силни струи од кал кои носеа возила и остатоци“, додаде тој. Телефонските линии во градот исто така се во прекин, што ги отежнува напорите за спасување, рече Али, а работниците не можат да влезат во Дерна поради големото уништување.

Али рече дека властите не ги предвиделе размерите на катастрофата. „Не беа добро проучени временските услови, не беа проучени нивото на морската вода и врнежите, брзината на ветерот, немаше евакуација на семејства кои би можеле да се најдат на патеката на бурата и во долините“, рече Али. „Либија не беше подготвена за таква катастрофа. Никогаш не сме биле сведоци на вакво ниво на катастрофа. Признаваме дека имало недостатоци иако ова е прв пат да се соочиме со вакво ниво на катастрофа“, изјави Али за каналот Ал Хура.

Мисмари, портпаролот на ЛНА, рече дека поплавите зафатија неколку градови, вклучувајќи ги Ал-Бајда, Ал-Марџ, Тобрук, Такенис, Ал-Бајада и Батах, како и на источниот брег до Бенгази.

Либија, земја со шест милиони жители, е поделена меѓу завојуваните фракции од 2014 година, по бунтот поддржан од НАТО против Моамер Гадафи во 2011 година. Едната влада е во Триполи, на запад, предводена од Абдул-Хамид Дбеибех, а другата на исток, поддржана од Калифа Хафтар.

Шефот на либиската источна влада, поддржана од парламентот, Осама Хамад, ја опиша ситуацијата како „катастрофална и без преседан“, според извештајот на државната новинска организација ЛАНА.

Снимките објавени на социјалните мрежи покажуваат потопени автомобили, срушени згради и порои вода кои брзаат низ улиците.

Болниците во источниот град Бајда се евакуирани по големите поплави предизвикани од силно невреме, според видео снимките споделени на Фејсбук од Медицинскиот центар Бајда.

„Обединетите нации во Либија внимателно ја следат вонредната ситуација предизвикана од тешките временски услови во источниот регион на земјата“, соопшти Мисијата за поддршка на Обединетите нации во Либија во објава на Платформа Х (поранешен Твитер).

Неколку земји испратија сочувство и понудија помош за Либија додека спасувачките тимови се обидуваат да најдат преживеани под урнатините.

Турската агенција за катастрофи во понеделникот соопшти дека ќе мобилизира 150 лица за пребарување и спасување, заедно со шатори, возила за спасување и други материјали, како што се генератори.

Американската амбасада во Либија на X објави дека е во „близок контакт со Обединетите нации и со властите во Либија за да се утврди колку брзо „можеме да обезбедиме помош онаму каде што е најпотребна“.

Претседателот на Обединетите Арапски Емирати, Зајед Ал Нахјан, нареди испраќање помош и тимови за пребарување и спасување, притоа изразувајќи го своето сочувство до погодените од катастрофата, објави државната новинска агенција.

Сочувство до Либија изрази и египетскиот претседател Абдел Фатах Ел Сиси. „Посакувам брзо закрепнување на повредените и се надевам дека кризата брзо ќе помине со обединувањето на Либијците“, рече Ел Сиси во изјавата на социјалните мрежи.

Дождот за време на викендот е резултат на остатоците од многу силен систем со низок притисок, кој националните метеоролошки служби во Југоисточна Европа официјално го нарекоа Бура Даниел.

Невремето донесе катастрофални поплави во Грција минатата недела пред да се пресели во Медитеранот и да се развие во тропски циклон.

Слични содржини

Пентагон: Кина забрзано го зголемува својот нуклеарен арсенал, до 2030...

Ќе се снимаат игран филм, документарец и ТВ-серија посветени на...

Чупеска: Мицкоски сака да биде истражител и обвинител

Британскиот адмирал: На чекор сме од нуклеарен армагедон

ВМРО-ДПМНЕ: МВР за 24 часа покажа дека работи повеќе отколку...

Мицкоски на средба со полскиот премиер Туск во Брисел