Унгарскиот премиер Виктор Орбан денеска изјави дека на лидерската средба во Гранада ќе треба да се разговара за голем број важни работи и дека е потребен стратешки план за проширување на ЕУ.
Тој пред почетокот на состанокот на лидерите на ЕУ во Гранада им рече на новинарите дека „ако сакате сериозно да зборувате за членството на Украина, потребен е стратешки документ, а тоа досега не е видено“.
Украина е во војна
„Треба да знаеме зошто е важно ЕУ да ја интегрира Украина и кои се последиците од тоа, пред се безбедноста. Тоа е земја во војна, никогаш не сме го правеле ова со земја во војна, има многу прашања за кои треба да се разговара стратешки“, рече тој.
Азербејџан е важен
На прашањето за санкциите против Азербејџан, Орбан рече дека тоа е голема земја без која нема енергетска независност.
„Ако сакате независност од руската енергија, Азербејџан ни е неопходен. Тоа е стратешки важна земја“, рече Орбан.
Проблеми со мигрантите
На прашањето за миграцијата, Орбан рече дека Полска и Унгарија не се задоволни од постојната ситуација и дека мора да се постигне компромис.
Тој посочи дека земјите-членки на Европската унија немаат шанси да постигнат договор за миграцијата.
„Лидерите на ЕУ првично се согласија дека регулативите за миграција ќе бараат едногласност, но ова беше променето на последниот самит. Бидејќи Унгарија и Полска се целосно изоставени од новиот миграциски пакет, невозможно е да се постигне нов договор бидејќи сме ‘правно силувани’, така што после ова нема шанси за некаков компромис и договор за миграцијата. Политички тоа е невозможно. Не денес, општо кажано, во наредните години“, рече тој.