Иранскиот претседател Ебрахим Раиси телефонски разговарал со саудискиот престолонаследник Мохамед бин Салман, објавија во средата иранските државни медиуми, што претставува првпат двајцата лидери да имаат личен контакт од почетокот на зближувањето на земјите на почетокот на оваа година.
Двајцата лидери разговараа за ситуацијата на Блискиот Исток, објави државната новинска агенција ИРНА. Според Иран, во разговорите било нагласено „единството на исламскиот свет“.
Израел беше фатен неподготвен од големиот напад на милитантите на Хамас од Појасот Газа во саботата и возврати со екстензивно бомбардирање на територијата. Повеќе од илјада луѓе загинаа од двете страни.
Иранските лидери ги пофалија нападите на Хамас врз Израел, но негираа директна вмешаност. Саудиска Арабија се смета за важен заштитник на Палестинците.
Во саботата, Ријад повика на итен прекин на ескалацијата, истовремено обвинувајќи го за нападите израелското „лишување на палестинскиот народ од неговите легитимни права“.
Иран и Саудиска Арабија долго време беа лути регионални ривали, но во март двете регионални сили објавија договор за обновување на дипломатските односи како дел од приближувањето со посредство на Кина.
Ријад ги прекина дипломатските контакти во 2016 година, откако демонстрантите ја нападнаа амбасадата на Саудиска Арабија во Техеран.