Во 2024 година, луѓето на возраст над 65 години ќе бидат побројни од оние помлади од 15 години во Европа, предупреди Светската здравствена организација (СЗО).
„Следната година се проценува дека популацијата на луѓе над 65 години ќе ги надмине оние под 15 години во европскиот регион на СЗО“, објави организацијата.
На глобално ниво, таква ситуација веројатно ќе се случи околу 2064 година, според проекциите на институтот „Our World in Data“.
„Тој тренд укажува на нови социјални, економски и епидемиолошки предизвици“, додаде организацијата чиј европски регион собира 53 земји, од кои некои се наоѓаат во Централна Азија.
Низ Стариот континент, продолжениот животен век често оди рака под рака со нарушено здравје.
Со цел да се ублажат ефектите од стареењето на населението, СЗО ги повикува властите да преземат мерки за „да им овозможат на постарите луѓе да го задржат и подобрат своето физичко и ментално здравје, независност, социјална благосостојба и квалитет на живот“.
Меѓу препорачаните мерки се издвојуваат урамнотежена исхрана и физичка активност од најмалку 150 минути неделно.
„Уште поинтензивната физичка активност може да го намали ризикот од смртност од сите причини за 35 отсто“, посочува СЗО.