Американските разузнавачки агенции веруваат дека експлозијата во болницата Ал Ахли во Газа пред една недела била предизвикана од палестинска ракета чиј мотор откажал и се распаднала на два дела, додека боевата глава удрила во болничкиот паркинг, пренесува NBC News.
Палестинското министерство за здравство соопшти дека во експлозијата во болницата Ал Ахли на 17 октомври загинале 471 лице, а причина за експлозијата е воздушен напад на израелските сили. Од друга страна, израелските власти соопштија дека експлозијата била предизвикана од ракета на палестинската милитантна група Исламски џихад.
Зборувајќи со новинарите по телефон, претставниците на разузнавањето навеле дека имаат „голема доверба“ во нивната проценка дека Израел не ја истрелал ракетата, но се помалку сигурни кои палестински милитанти ја испукале ракетата на 17 октомври.
„Со голема сигурност оценуваме дека Израел не е одговорен за експлозијата во болницата и дека се одговорни палестинските милитанти. Со помала сигурност оценуваме дека палестинскиот Исламски џихад е одговорен за лансирањето на ракетата која падна врз болницата“, изјавил еден од разузнавачите.
Американските власти претходно посочија дека најверојатно е одговорен палестинскиот Исламски џихад, или PIJ, а Израел ја обвини групата за експлозијата.
Милитантната група ја дели целта на Хамас да го уништи Израел, но е помала од Хамас, кој владее со Појасот Газа.
Доказите кои укажуваат на PIJ се засноваат на пресретнати разговори меѓу осомничените „милитанти поврзани со Хамас“, кои се чини дека шпекулирале за тоа кој стои зад лансирањето на ракетата, наведуваат официјални лица.
Експлозијата во болницата Ал-Ахли предизвика бес низ арапскиот свет, каде што беше прифатена верзијата за настаните презентирани од палестинските власти и Хамас дека Израел е одговорен.
Американската проценка за проектилот се заснова на разузнавачки информации, „физичка активност“, достапни видео снимки и фотографии кои сите укажуваат на ракетна експлозија, а не на бомба фрлена од авион или артилериска граната што ја користеле израелските сили, рекоа официјалните лица.
Меѓу снимките што разузнавачката заедница ги анализираше беше и една што беше емитувана на телевизијата „Ал Џезира“.