Ситуацијата во Појасот Газа е „трагедија од колосални размери“, оцени денеска Агенцијата на ОН за помош и работа на палестинските бегалци (UNRWA), еден месец по почетокот на конфликтот меѓу Израел и палестинската милитантна група Хамас.
UNRWA во објава на мрежата X наведува дека еден месец на луѓето низ Појасот Газа им се одбива помош, умираат и се принудени да ги напуштат своите домови поради бомбардирањето.
„Секојдневно се борат да добијат леб и вода. Луѓето се одделени од најблиските и остатокот од светот. Ова е принудно раселување и хуманитарна трагедија од колосални размери“, се наведува во соопштението, пренесува „Танјуг“.
По нападот на Хамас, Израел започна силни воздушни напади и воведе блокада на Појасот Газа, а потоа копнените единици на израелската армија влегоа во палестинската енклава.
Бројот на загинати Палестинци во Појасот Газа од почетокот на конфликтот надмина 10.000, од кои 4.100 се деца, соопшти вчера министерството за здравство во Газа, кое е под контрола на Хамас.