Консензус за одлуките кои би биле од корист за Украина на самитот на ЕУ во Брисел би бил „многу важен знак“ за Киев и Москва, изјави германскиот канцелар Олаф Шолц пред почетокот на самитот на ЕУ.
Лидерите собрани во Брисел мора едногласно да одлучат дали ќе ги отворат пристапните преговори со Украина и ќе му дадат на Киев долгорочна финансиска помош вредна до 50 милијарди евра. Унгарскиот премиер Виктор Орбан постојано се закануваше дека ќе стави вето на овие одлуки.
„Важно е да се испрати јасен знак на поддршка овде. Знак упатен до храбрите граѓани на Украина кои ја бранат својата земја“, рече Шолц.
„Но, сигналот е насочен и кон рускиот претседател, кој мора да знае дека не може да смета дека Европската унија и нејзините земји-членки ќе ја намалат поддршката за Украина“, рече германскиот канцелар.
Уште еднаш, во пресрет на почетокот на самитот, унгарскиот премиер Виктор Орбан јасно се спротивстави на отворањето на пристапните преговори со Украина и рече дека за тоа може да се разговара само кога Киев ќе ги исполни потребните услови. Орбан се противи и на пакетот помош од 50 милијарди евра за Украина за периодот до 2027 година. Со оглед на унгарското противење на клучните одлуки за ЕУ, се очекува овој самит да трае долго.