Долниот дом на шпанскиот парламент во вторникот го отфрли предлог-законот за амнестија за каталонските сепаратисти поради несогласувањето околу неговиот опсег меѓу владејачките социјалисти и каталонската сепаратистичка партија, што е удар за премиерот Педро Санчез што покажува колку е несигурна неговата поддршка во парламентот.
Предлог-законот, отфрлен со 179 гласови „за“ и 171 „против“, сега се враќа на парламентарната комисија и на крајот може да биде испратен на ново гласање во Долниот дом.
Предлог-законот ќе го дефинира вториот мандат на Педро Санчез.
Каталонската сепаратистичка партија Јунтс (Заедно за Каталонија) гласаше против нацрт-законот откако не постигна договор со Шпанската социјалистичка работничка партија на Санчез.
Јунтс побара сите исклучоци поврзани со тероризмот да бидат отстранети од нацрт-законот бидејќи некои од нивните политичари се под истрага за тероризам.
Предлог-законот беше изнесен од социјалистите во замена за поддршка за новиот мандат на Санчез од каталонските сепаратистички партии Републиканска левица од Каталонија и Јунтс.
Претставничката на Јунтс, Миријам Ногуерас, рече дека предлог-законот е премногу селективен и има премногу законски дупки.
Но, партијата на Санчез тврди дека некои злосторства поврзани со тероризам не можат да бидат простени.
Амнестијата ќе ги опфати сите настани поврзани со каталонското движење за независност од 2012 година, вклучително и симболичното гласање во 2014 година и референдумот за независност во 2017 година, кои судовите ги прогласија за незаконски.
Тоа треба да се однесува на неколку стотици сепаратисти и некои полицајци кои упаднаа во избирачките места за време на референдумот.
Санчез, кој претходно се спротивстави на амнестијата и се уште се противи на референдумот за независност, тврди дека сака да го зајакне помирувањето со нацрт-законот. Конзервативната опозиција го обвинува за поткопување на владеењето на правото.