Хамас предложи план за прекин на огнот кој ќе го замолчи оружјето во Газа за четири и пол месеци, со што ќе заврши војната, како одговор на предлогот направен минатата недела од катарските и египетските посредници и поддржан од САД и Израел, пренесува „Ројтерс“.
Според документот во кој „Ројтерс“ имал увид, контрапредлогот на Хамас предвидува три фази, од кои секоја би траела 45 дена.
Тој предлог би вклучувал размена на преостанатите израелски заложници киднапирани на 7 октомври за палестински затвореници. Би започнала обновата на Газа, израелските сили целосно би се повлекле, а телата и посмртните останки би биле разменети.
Американскиот државен секретар Ентони Блинкен пристигна во Израел во текот на ноќта по средбата со посредниците од Катар и Египет во најсериозните дипломатски напори во војната досега, со цел да се постигне продолжено примирје. Деталите за контрапонудата на Хамас претходно не беа откриени.
Според контрапредлогот на Хамас, сите израелски заложници, мажи под 19 години, стари лица и болни ќе бидат ослободени во првата фаза во замена за палестинските жени и деца во израелските затвори.
Останатите машки заложници ќе бидат ослободени во втората фаза, а посмртните останки во третата фаза.
До крајот на третата фаза, Хамас очекува двете страни да постигнат договор за завршување на војната.
Групата, која владее со Газа, во додатокот на предлогот навела дека сака ослободување на 1.500 затвореници, од кои една третина би избрала од списокот на Палестинци осудени на доживотен затвор во Израел.
Прекинот на огнот исто така ќе го зголеми протокот на храна и друга помош за цивилите во Газа, кои се соочуваат со глад и сериозен недостиг на основни потреби.
Израел започна воена офанзива против Газа откако милитантите на Хамас убија 1.200 луѓе и зедоа 253 заложници во јужен Израел на 7 октомври.
Министерството за здравство на Газа соопшти дека најмалку 27.585 Палестинци биле убиени, а се стравува дека има уште илјадници мртви.