Полската армија соопшти дека ги започнала сите потребни процедури за обезбедување на воздушниот простор на земјата, откако утринава била забележана интензивна активност на руската авијација со долг дострел.
Како што е објаснето, тоа е поврзано со ракетните напади утринава на територијата на Украина, а „Оперативната команда на вооружените сили на Полска континуирано ја следи ситуацијата“, наведува полскиот неделник „Впрост“.
Во соопштението се наведува и предупредување до населението дека се активирани полските и сојузничките авиони и дека тоа може да го зголеми нивото на бучава, особено во југоисточниот дел на земјата.
Ноќта меѓу вторникот кон средата беше објавена противракетна узбуна низ цела Украина, а воздухопловните сили на земјата известија дека заканата е предизвикана од лансирање на крстосувачки ракети од авионот Ту-95МС.
Набргу по 6 часот по локално време, се појави извештај дека „ракетните маневри во областа Лавов се приближуваат до границата со Полска“, но во последователната порака се вели дека проектилот го променил курсот и се движел кон Лавов, град во западна Украина, наведува „Впрост“.