Партијата Левица се залага за намалување на работното време од 8 на 6 часа дневно, без негативни импликации на висината на платата и додатоците кои ги примаат работниците. Оттаму потсетуваат дека со цел подобрување на рамнотежата помеѓу работата и приватниот животот, како и продуктивноста на работниците, Шведска има изведено експеримент со кој го намалува стандардното работното време од 8 на 6 часа во денот.
Експериментот бил спроведен во една општина во Гетеборг, каде на работниците им била задржана истата месечна плата и по скратувањето на бројот на работни часа во денот.
-Овој прогресивен чекор имал за цел да го истражи влијанието кое пократкиот работен ден би го имал на задоволството, благосостојбата и работниот учинок на работникот.
Придобивките од шестчасовниот работен ден биле очигледни преку искуствата на работниците кои пријавиле подобрено задоволство од работата, како и подобрена рамнотежа помеѓу работата и приватниот живот. Скратениот работен ден довел до зголемена ефикасност на учинокот на работниците, намален стрес и исцрпеност од работата.
Покрај тоа, експериментот ја предизвикува конвенционалната идеја дека подолгите часови се нужно поврзани со зголемена продуктивност. Шведскиот експеримент служи како пионерски пример за тоа како повторното разгледување на традиционалните работни структури може да резултира со позитивни резултати и за вработените и за работодавците, отворајќи го патот за попрогресивен пристап кон работата во модерната ера, стои во соопштението на партијата на Димитар Апасиев.