Реал Мадрид веќе заврши сериозна работа со ангажирањето на Килијан Мбапе кој на лето ќе се пресели на „Сантијаго Бернабеу“, а за да остане во игра со „кралскиот клуб“, Барселона очигледно има „ас во ракавот“.
Имено, како што пренесуваат шпанските медиуми, кои снимаа и видеа, директорот на Барселона, Португалецот Деко, во текот на денот во Барселона се сретнал со агентите кои се грижат за кариерата на Ерлинг Халанд.
Рафаела Пименто и Максвел се сретнале со Деко, а како што се наведува, разговорот бил за иднината на норвешката суперѕвезда која настапува за Манчестер Сити.
Халанд е големиот сон на Жоан Лапорта, но прашање е колку ова е премногу амбициозен план за Барса, која има сериозни финансиски проблеми поради долгогодишниот лош бизнис, а има граница да потроши најмногу 200 милиони евра за плати.
Секако, доколку Халанд потпише за Барса, а со Мбапе во Реал, повторно ќе имаме „Ел Класико“, што е спектакл само по себе, како што беше случајот кога за овие тимови играа Кристијано Роналдо и Лионел Меси.