Мидо: Салах следната сезона ќе игра во Саудиска Арабија

Поранешниот египетски интернационалец Мидо на социјалната мрежа Икс (поранешен Твитер) ја објави бомбастичната вест за неговиот сонародник Мохамед Салах.

„Мохамед Салах следната сезона ќе игра во Саудиска Арабија. Договорот е потпишан“, напиша 41-годишниот поранешен напаѓач на Марсеј, Рома, Тотенхем, Вест Хем, Ајакс и други.

31-годишниот Салах беше трансфер цел на Ал Итихад летото. Саудискиот тим понуди 150 милиони фунти на крајот од преодниот рок, а Ливерпул ја одби понудата.

Египќанецот има договор со „црвените“ до летото 2025 година и е еден од најважните играчи во тимот на Јирген Клоп. Сепак, германскиот тренер си заминува на крајот од сезоната и можно е Салах да го следи.