Гита Гопинат, првиот заменик-управен директор на Меѓународниот монетарен фонд, ги повика САД да го намалат растечкиот фискален долг, нагласувајќи дека силниот раст на нивната економија овозможува помали трошоци и повисоки даноци.
Гопинат рече дека сега е време развиените земји да „инвестираат во фискална консолидација“ и да го решат прашањето за намалување на долгот на нивоа пред пандемијата. „САД имаат многу простор да ги намалат своите фискални дефицити, со оглед на силата на нивната економија“, изјави Гопинат за „Фајненшл Тајмс“.
Предупредувањата доаѓаат додека економистите и инвеститорите се загрижени дека годините на фискално трошење од страна на демократите и републиканците создаваат долгорочни проблеми за американската економија.
Канцеларијата за буџет на Конгресот, која го надгледува федералниот буџет, предвидува дека односот на долгот и БДП ќе го надмине претходниот рекорд од Втората светска војна до 2029 година. Дефицити меѓу 5,2 и 6,3 проценти се очекуваат во следната деценија, освен ако Конгресот не ги промени своите планови.
Во април ММФ во својот „Фискален монитор“ наведе дека очекува фискален дефицит на САД од 7,1 отсто следната година, што е повеќе од трипати поголем од просекот од два отсто во другите развиени економии. Се предупредува дека фискалните дефицити во САД и Кина претставуваат „значителни ризици“ за глобалната економија.
Од 2025 година се очекува многу за фискалната перспектива на САД, бидејќи Доналд Трамп ветува дека ќе ги врати даночните олеснувања од 2017 година, доколку биде реизбран.