ЛЕГЕНДАРНИОТ вестерн A Fistful of Dollars, во режија на Серџо Леоне, го добива својот прв римејк. На римејкот работат продуцентските куќи Euro Gang Entertainment, основана од холивудскиот ветеран Џани Нунари и Jolly Film, која работеше на оригиналниот вестерн и познатиот италијански продуцент Енцо Систи, потврди „Дедлајн“.
Филмот A Fistful of Dollars од 1964 година, со Клинт Иствуд во главната улога, се смета за прв шпагети вестерн, а исто така е одговорен за повторното оживување на популарноста на вестерните во 60-тите и 70-тите години. Покрај тоа, тој е првиот филм од култната „доларска трилогија“ на Леоне, која ги вклучува и филмовите „For a Few Dollars More“ и „The Good, the Bad and the Ugly“.
Приказната следи осамен вооружен револвераш (Иствуд) кој пристигнува во мал град во Ново Мексико, каде што две ривалски семејства се борат за превласт над трговијата со оружје и алкохол. Едното семејство го сочинуваат браќата Дон Мигел, Естебан и Рамон, а другото е семејството Бакстер, предводено од шерифот Џон Бакстер. Двете семејства се обидуваат да го регрутираат искусниот пиштолџија, не знаејќи дека тој има свои планови.
Инспирација за вестернот A Fistful of Dollars беше јапонскиот самурајски филм Yojimbo, во режија на Акиро Куросава и со Тоширо Мифуне, честиот соработник на Куросава.
Претстојниот римејк моментално е во рана фаза на развој. Се претпоставува дека филмот ќе биде на англиски јазик, но тоа се уште не е потврдено. Продуцентските куќи исто така не открија кога ќе започне снимањето или кој ќе глуми во филмот.