Претседателот на Србија Александар Вучиќ изјави дека е демократско право на еколошките активисти да го изразат своето незадоволство на улица поради проектот „Јадар“ и посочи дека тоа е во ред, се додека „Не ги малтретираат луѓето“.
„Тие стојат, седат, викаат, врескаат што било – се е во ред. Кога ќе почнат да малтретираат, тепаат некого, тоа е крајот и тоа е тоа. Значи, демократија, тоа е природно. Но ние нема да бидеме ни приближно брутални како оние во Европа, да ги тепаме и малтретираме затоа што некаде нешто завзеле… Ние тука сме многу потолерантни, ќе се грижиме, ќе ги чуваме како малку вода на дланка, за тоа воопшто да не се грижат“, рече Вучиќ во Лондон, каде утре ќе учествува на Самитот на европската политичка заедница.
Тој одговори на новинарското прашање да ги коментира најавите на одредени еколошки активисти дека поради новата владина уредба за проектот „Јадар“ ќе излезат на улица за да ја заштитат природата и им порача на секој што мисли дека со вакви демонстрации ќе дојде до власт и ќе се промени волјата на народот „Дека такво нешто нема да се случи“, пренесува Танјуг.