Стапи на сила националната забрана за мобилни телефони во холандските училишта.
На почетокот на оваа година мобилните телефони беа забранети во училниците во средните училишта, а сега со почетокот на новата учебна година оваа мерка е проширена и во основните училишта.
Министерството за образование во Хаг соопшти дека мобилните телефони го одвлекуваат вниманието на учениците и ја намалуваат нивната способност за концентрирање, што негативно влијае на перформансите во учењето.
Телефоните сè уште можат да се користат на час доколку се неопходни за содржината на часот, на пример кога се учи за медиумски вештини.
На учениците им е дозволено да користат мобилни телефони доколку е потребно поради здравствени причини, а одговорноста на училиштето е да ја спроведе забраната на лице место.
-Атмосферата се подобрува во училиштата каде мобилните телефони се забранети дури и за време на одморите, објави каналот НОС.
„Паузите се посоцијални затоа што учениците на крајот почесто разговараат меѓу себе“, вели истражувачот Лое Пауелс од Универзитетот Радбауд во Нијмеген.
Забраната на мобилни телефони во училиштата е тема на контроверзна дебата во Холандија.
Во исто време, многу родители тврдеа дека децата што одат во основно училиште воопшто не треба да имаат паметни телефони, токму поради ризикот од зависност од социјалните мрежи.
Грција и Италија ги забранија мобилните телефони во училниците, додека Германија веќе подолго време дебатира за таков потег.
Една неодамнешна студија на Организацијата за економска соработка и развој (ОЕЦД) препорачува ограничена и одговорна употреба на мобилни телефони во училиштата.