Унгарија е подготвена да посредува меѓу Бугарија и Македонија за да се најде решение „што е прифатливо за двете страни“, рече унгарскиот премиер Виктор Орбан на прес-конференција во Охрид по заедничката средба на министрите од Унгарија и Македонија. Како историска грешка го дефинираше одвојувањето на Македонија и Албанија на патот кон влез во ЕУ.
„Народите и земјите од Западен Балкан заслужуваат многу повеќе од она што го добиваат од Брисел. Северна Македонија е кандидат за членство во ЕУ од 2005 година заедно со Хрватска. Оттогаш, Хрватите се веќе членки на ЕУ, а преговорите со Северна Македонија не се ни започнати. Ова е историска грешка која може да се зголеми бидејќи земјата ќе биде ставена зад Албанија, за што не гледам причини. Ќе биде предизвик за владата да се бори против овој нефер третман“, рече Орбан на заедничката прес-конференција со премиерот Христијан Мицкоски.
Според Орбан, одвојувањето на Македонија и Албанија е тешко разбирливо и „ЕУ мора да ја земе предвид и националната гордост, а националната гордост на граѓаните на Северна Македонија е повредена“.
„Ако гледаме искрено, вие одамна требаше да бидете дел од ЕУ, а ваквите постапки на ЕУ отвораат рани“, рече Орбан, кој е дециден дека земјава треба да започне вистински преговори со ЕУ до крајот на годината.
„Стабилноста на Западен Балкан и интеграцијата во ЕУ е многу важна. Членството во ЕУ е огромна можност. Сите видовме дека напредува, но проширувањето на ЕУ ја изгуби својата динамика и ние мора да го обезбедиме тоа. Не го игнорираме фактот дека Украина и Молдавија добија извонредно забрзување на патот кон ЕУ. Но, треба да ги почитуваме земјите кои долго време работеа за ова, а сега ги ставаат на втор план и тоа не е фер. И затоа сметаме дека е важно Западен Балкан да биде дел од ЕУ и затоа сакаме брз процес на приклучување на Северна Македонија во ЕУ“, рече унгарскиот премиер.
Според Мицкоски, само две страни биле задоволни од одлуката за раздвојување на Скопје и Тирана – „политичарите на источниот сосед (Бугарија) и опозицијата кај нас дома“.
„Не смееме да губиме надеж и очај, иако многупати сме биле разочарани. Жал ми е што ова се случува и што мораме повторно да бидеме жртви на билатерализацијата (на европската интеграција). Ќе продолжиме да работиме на прашањата дома. Добро е што имаме пријатели во ЕУ и овие пријатели сакаат да го прошират нашиот глас во ЕУ. Еден од овие пријатели е Виктор Орбан и ова што се случува овде во последните два дена е симбол на пријателство. На албанската влада ѝ посакувам се најдобро, брзо завршување на преговорите и членство во ЕУ. Се надевам дека и ние можеме да бидеме дел од ова семејство и да седнеме на истата маса“, рече Мицкоски, кој ја оцени посетата на Виктор Орбан „како доказ за одлични пријателски односи и соработка кои секојдневно се продлабочуваат“.